Kazèk Dumas yo esplike sitiyasyon difisil seksyon kominal yo a ap fè fas

Photo Fbk Gabrielle Macaronne, Kazèk Dumas

Seksyon kominal se dènye delimitasyon teritoryal ki genyen nan peyi dayiti. Menm si anpil gwo save nan Kesyon devlòpman toujou di, tout devlòpman reyèl dwe komanse nan seksyon kominal yo men sa pa anpeche pouvwa santral toujou trete seksyon kominal yo an paran pov.
Nan sans sa, nan kad yon entevyou yo bay redaksyon #Script_Média_TV" samdi 4 septanb 2021 an, otorite lokal yo nan seksyon kominal Dumas pou komin Fort-liberté, Nan Nòdès peyi  a, drese yon tablo sonb de ansanm diffikilte seksyon kominal  yo a ap fè fas. Se te Okazyon pou yo te denonse pouvwa santral ki pa janm mete anyen kòm mwayen nan bidjè peyi a pou ede seksyon kominal yo avanse.

Nan dosye ekonomi, Kròdonatè Kazèk Dumas, Gabrielle Macaronne di, akrikilti ak elvaj se 2 prinsipal sous revni abitan nan zòn nan genyen. Lapli ki pa janm tonbe mete  peyizan yo nan gwo diffikilte  pou rive jwenn dlo pou wouze jaden sitou ak Baraj Maryon ki kenbe yon bon pati nan dlo a, menm si yo lage'l chak vendredi men li pa sifi akoz pa genyen Kanal irigasyon, selon esplikasyon Kazèk la.

Nan dosye sekirite
"Dumas pa genyen pòs polis, se nou menm Kazèk yo ki oganize nou ak popilasyon an pou mete yon brigad sou pye pou ede konbat ensekirite a. Men sa pa anpeche nou genyen kèk ka de vol de betay men se pa souvan" paròl  Nironel Cherenfant youn nan manb adjwen yo

Nan Kesyon  sante
Kazèk Gabrielle Macaronne fè Konen Dumas pa gen sant sante, selman yon klinik men ki pa fonksyone nòlmal. Pi lwen  Macoronne di, seksyon kominal li a ap fas ak yon grav problèm sante. "Lè pou fanm ansent akouche se yon veritab tèt chaje, kèk fwa yo menm konn rive pedi lavi yo" esplisyon Kazèk Macaronne ak yon vizaj tris.

Sou Kesyon elektrisite
"Dumas pa gen elektrisite, men nou genyen selman 68 poto ki kanpe nan kad yon projè ki tap egzekite avèk 5 000 000 goud fon kominal yo, men nou rete konsa nou wè projè a kanpe san yo pa bay nou esplikasyon" deklarasyon Gabrielle Macaronne. Sepandan nan kad projè sa, yo te genyen pou mete poto ak triplèks jiskaske yo fè lòt demach  pou jwenn kòb pou finalize projè a, toujou esplikasyon kòdonatè Kazèk la panda li promet pou ale chèche plis enfòmasyon pou  pote bay popilasyon an sou projè sa.

Nan sa ki gen a wè ak edikasyon, Dumas pa gen lekol sekondè nan sans sa Kazèk yo di, yo prè pou bay kontibisyon yo si tout fwa pouvwa santral ou byen nenpòt lòt ONG  ta vle ede yo.

"Kazèk yo jwe plizyè ròl nan seksyon kominal yo. nou jwe wol  jij, la polis elatriye paske se nou ki pi pre popilasyon nenpòt problèm yo genyen se nan Biwo Kazèk la yo vini epi se nou ki pi maltre. Kazèk yo pa genyen yon bon salè e sak pi dròl la yo konn fè 15 mwa san yo pa bay nou yon goud,  deklarasyon tris Nironel Cherenfant.
Finalman responsab seksyon kominal Dumas yo mande Leta santral fon kout je gade seksyon kominal yo paske pap gen bon jan devlòpman yap pale a san entegrasyon kolektivite yo.

guerlinoxilas@gmail.com